‫الرئيسية‬ هنخرج فين؟ خروجة في المنيل مكلفتش أكتر من 100 جنيه
هنخرج فين؟ - مارس 10, 2018

خروجة في المنيل مكلفتش أكتر من 100 جنيه

المنيل مرتبط كمكان بذكريات ناس كتير مننا؛ للناس اللي كانت بتدرس أو لسه بتدرس في جامعة القاهرة. أو الناس الي عايزة مكان رخيص على النيل، أو للناس اللي بتحب تأكل وتتبسط.

 

تروح إزاي؟:

 

 

لو هتروح بالمترو فأقرب محطتين مترو هي السيدة زينب، أو الملك الصالح على حسب أنت هتروح فين هناك، وتتمشى من بعدها عشر دقايق للمكان اللي تحبه هناك.

 

قصر محمد على في المنيل:

 

 

من كام سنة وزارة الآثار أعادت فتح قصر محمد على في المنيل. القصر ده يخص حفيد محمد على الكبير. في أكتر من 5 قاعات، وجنينة ونوافير، وتذكرة دخوله 20 جنيه، وكله زخارف معمارية جميلة، ولو عايزين تتصوروا بكاميرا بروفيشنال ممكن تدفعوا 50 جنيه تقسموها عليكم وبارك الله فيما رزق.

 

فلوكة في النيل:

 

 

المنيل ميزته إنك ممكن تأجر فلوكة أياً كان عدد أصحابك، من أول 2 لو اتنين حبيبة لحد 40 فرد لو عايزين هتضبطوا عدد كبير (ديش بارتي في رمضان أو حفلة خطوبة على الضيق). أشهر واحد هناك دقدق المراكبي ممكن لو أنتوا 8 أفراد تطلع بـ100 جنيه يعني كل واحد أقل من 20 جنيه. بالمناسبة المراكب دي عند الفورسيزونز يعني نفس الفيو للي دافع 1000 جنيه برضه فممكن تطلع لسانك ليهم عادي جداً. بس خد معاك ترمس وشيبسي وأكل عشان القعدة ساعتين هناك بتجوّع.

 

صيد السمك:

 

 

لو أنت بتحب الصيد وعند صبر ليه – أنا بصراحة معنديش – ممكن تاخد سنارتك وشنطة الطُعم وتطلع على هناك. لأن من ناحية الكورنيش الل عند الفورسيزونز أو الكورنيش الصغير اللي عند كلية صيدلة في فرص صيد للسمك كتير. فمتضيعش على نفسك الفرصة دي بدل ماتلبس في سفرية للبحر، أهو في حاجة ببلاش أهي!

 

الآيس كريم للكل المستويات:

 

 

الآيس كريم في المنيل ليه طعم تاني خالص. لأن في أماكن كتير بتقدمه بأسعار مختلفة؛ عندك الجوكي اللي في شارع المنيل أسعاره من أول 8 جنيه، وفي آيس كريم موفينبيك اللي في الروضة الي بيبدأ من 30 جنيه! فانت وميزاينيتك بقى وشوف حابب تأكل فين.

 

بالنسبة للسينما:

 

 

سينما جالكسي من أحسن السينمات في مصر، ومازدتش زيادة فلكية، سنما جالكسي فيها أكتر من 6 قاعات سينما عشان مختلف الأذواق، التذكرة في سينما جالكسي في حفلات الصبح بـ40 جنيه وحفلات بليل بـ60 جنيه. بس بلاش الفيشار من هناك عشان غالي.

 

كافيهات بلو بلو:

 

 

في شارع عبد العزيز آل سعود كان في مجمع مطاعم وكافيها اسمه بلو بلو، ممكن تأكل وتتبسط عشان لو جوعت. الكافياهات زي gizzily وcafeshop company. في آخر الشارع برضه في مطعم أكل اسمه Tajory بيقدم أكل مصري وطواجن وحاجات فخيمة كده؛ الأكل كمياته حلوة وتشبّع والأسعار كويسة ومناسبة، وبيبقى في مطرب برضه ساعات في الويك إند.

‫شاهد أيضًا‬

التصويت في اسطنبول يشير إلى تحول في هيمنة أردوغان في تركيا

التغيير و الأمل و بداية جديدة. هذا هو وعد رئيس بلدية اسطنبول المنتخب حديثاً Ekrem Imamoglu…